MADARAKA  NYERERE ABISHANA NA RAIS MSITAAFU  MKAPA

MADARAKA Nyerere ambaye ni mtoto wa Baba wa Taifa Mwalimu Julius Nyerere, ameibuka na kuthibitisha kuwa Mbunge wa sasa wa Musoma mjini (Chadema), Vincent Nyerere ni mdogo wao na mwanafamilia hiyo, kwani ni mtoto wa baba yao mdogo, Josephat Kiboko Nyerere.

Kauli ya Madaraka imekuja siku chache baada ya Rais mstaafu wa awamu ya tatu Benjamin Mkapa, kudai kwamba hamtambui mbunge huyo kuwa ni miongoni mwa familia ya Mwalimu Nyerere kwani katika kipindi chote alichofanya kazi na Mwalimu, hakusikia jina hilo.

Jumatatu ya wiki, akizindua kampeni za CCM katika uchaguzi mdogo wa Arumeru Mashariki, mkoani Arusha, Mkapa aliuambia umati uliohudhuria kwamba hakuwahi kusikia kama kulikuwa na mtoto wa familia hiyo aliyekuwa akiitwa Vincent Nyerere.

Kauli hiyo ilipingwa vikali juzi na Vincent akisema si jambo la ajabu Mkapa kutomfahamu yeye kwasababu Mkapa si sehemu ya ukoo wao huku akimrushia kombora kwamba akiwa madarakani alishinikiza Mwalimu Nyerere kupelekwa Hospitali ya St Thomas, Uingereza, kinyume na matakwa ya familia yao na wakati huo huo, daktari wake Profesa David Mwakyusa alijua maradhi ya mwasisi huyo wa taifa.

Vincent alikwenda mbali zaidi na kumshambulia Mkapa kwa kuongoza ubinafsishaji holela enzi za utawala wake huku akimtuhumu kuuza viwanda na rasilimali za nchi kwa kisingizio cha ubinafasishaji.      

Jana gazeti hili liliwasiliana na Madaraka kutaka kupata ukweli wa kauli hiyo ya Mkapa. Katika jibu lake fupi, Madaraka alithibitisha kuwa Vincent ambaye sasa ni Meneja Mwenza wa Chadema katika kampeni za Arumeru Mashariki, ni mmoja wanafamilia ya Mwalimu Nyerere  ambayo chimbuko lao ni Kijiji cha Butiama mkoani Mara.

Katika jibu lake alilolituma kwa barua pepe Madaraka alisema; “Naomba kutoa maelezo yafuatayo kuhusu yanayozungumzwa kwenye kampeni za uchaguzi wa Arumeru; Ili kuepuka kujiingiza kwenye masuala ya kampeni, nitajibu sehemu ndogo sana ya maswali yako”.

Aliongeza “Nataka kuthibitisha tu kuwa Mhe. Vincent Nyerere ni ndugu yetu, mtoto wa marehemu baba yetu mdogo, Mzee Josephat Kiboko Nyerere. Hayo maswali mengine naomba yaelekezwe kwa Mhe. Benjamin Mkapa au Mhe.Vincent Nyerere”.

Maswali mengine ambayo Madaraka aliulizwa na Mwananchi ni pamoja na kwamba; Nani alishinikiza Mwalimu Nyerere kupelekwa St Thomas, Uingereza na kama familia hiyo iliridhia apelekwe Uingereza au nchi nyingine za Kijamaa.

Madaraka pia aliulizwa anamtambuaje Vincent Nyerere, Ni mmoja wa familia hiyo ama la?

Akizindua kampeni za CCM kwenye uwanja wa michezo wa Ngaresero, Usa River Jumatatu wiki hii, Mkapa alisema: 

“Nimefanya kazi na Mwalimu kwa miaka 25, nikiwa mwandishi wake, Waziri na katika muda huo, nimemzika yeye, kaka yake na mama yake mzazi, sijawahi kusikia jina la mtu kama huyo katika familia ya hiyo”.

Vicent alimtaka pia Mkapa kuacha kujiingiza katika masuala ya familia yasiyomuhusu na kwamba akiwa Rais mstaafu, ana kashfa nyingi zinazougusa utawala wake wa awamu ya tatu.

Chadema wazidi kumlipua 

Katika hatua nyingine, Mkapa amezidi kulipuliwa katika kampeni za uchaguzi huo mdogo baada ya mbunge mwingine wa Chadema, Israel Natse wa jimbo la Karatu na Peter Msigwa wa Jimbo la Iringa, kumtaka Rais huyo mstaafu na Serikali ya CCM kumuogopa Mungu kutokana na kuwadanganya wananchi wa Meru kuwa wakimchagua mgombea wa CCM watarudishiwa ardhi yao ambayo inamilikiwa na walowezi.

Wakizungumza katika mikutano tofauti ya kampeni jana, katika Kijiji cha Njeku na Sura, wachungaji hao, walisema kama Mkapa alikaa madarakani miaka 10 akashindwa kurejesha ardhi inayomilikiwa na walowezi itakuwaje, leo yupo nje amshauri Rais Kikwete kurejesha ardhi hiyo?"

Natse alisema, “Ndugu zangu msidanyanyike na kuendelea kuwasikiliza CCM miaka yote wameshindwa kurejesha ardhi ya Meru sasa wanaibuka…..huyo Mkapa alishindwa akiwa rais sasa amekaa nyumbani akisubiri posho ataweza kumshauri rais awarudishie ardhi yetu?” 

Wakati akizindua kampeni za CCM Machi 12 mwaka huu, Mkapa alisema CCM inatambua tatizo kubwa la ardhi katika jimbo hilo kwani kuna ardhi kubwa ambayo inamilikiwa walowezi na kuna maeneo ambayo hayatumiki ipasavyo kwa mujibu wa hati

miliki na tayari utambuzi umefanyika.

Mkapa alisema atamshauri Rais Kikwete kuchukuwa hatua kuhusiana na tatizo hilo, na kama kuna watendaji ambao watakwamisha watachukuliwa hatua.

Naye Mchungaji Msigwa, alisema moja ya sifa ya kuwa  mwana CCM ni kutomuogopa Mungu kwa kuwa mwongo, mtu wa kujipendekeza na mpenda rushwa  mambo ambayo

Chadema hayapo.” 

Alisema tatizo la Ardhi Meru litamalizwa na Wameru wenyewe na sio CCM kwani ndio waliosaidia kutoa ardhi kwa walowezi.

  

CCM wajibu mapigo

Katika kampeni zilizoanza rasmi jana baada ya uzinduzi uliofanyika Jumatatu wiki hii, CCM kimebeba ajenda ya kufuta kile kinachodaiwa kuwa ni uongozi wa kifalme unaotaka kujengwa ndani ya chama hicho.

Ajenda hiyo inatokana na madai ambayo yamekuwa yakitolewa kwenye mikutano ya Chadema kwamba wasimchague mgombea wa CCM, Siyoi Sumari kwani kwa kufanya hivyo watauegeuza ubunge wa Arumeru Mashariki kuwa Ufalme kwani watakuwa wanamrithisha mgombea huyo nafasi iliyoachwa wazi na baba yake mzazi.

Meneja wa kampeni wa CCM, Mwigulu Nchemba akimnadi Sioi jana alisema: “Chadema ndio vinara wa sera ya utawala wa kifalme na kwamba kudhihirisha hilo, baadhi ya wabunge wa chama hicho wameamua kusaidia watoto wao, wake pamoja mashemeji zao kupata nafasi ndani ya Bunge”.

Akihutubia mikutano ya kampeni katika sehemu za Shambarai, Msitu wa Mbogo na Mbuguni madukani, Nchemba aliwashutumu Chadema kwamba ndani ya chama hicho wamekuwa wakipeana nafasi kindugu.

Mwigulu alidai kuwa Katibu Mkuu wa chama hicho,Dk  Willibrod Slaa baada ya kuacha ubunge aliyekuwa mke wake, Rose Kamili amechaguliwa kuwa mbunge wa Viti maalumu kutoka mkoa wa Manyara.

Kwa upande wake mbunge wa Mtera (CCM), mkoani Dodoma, Livingstone Lusinde amekipiga vijembe Chadema kwa madai kwamba kinatumia alama ya vidole viwili kama manati huku akiwaambia wakazi wa Shambarai manati kamwe haiwezi kuua tembo.

Lusinde alisema kwakuwa Chadema wamekuwa wakiendeleza sera za matusi katika mikutano yao ya kampeni, nao (CCM) watamwomba mwenyekiti wao, Rais Jakaya Kikwete kuwapa ruksa ya kujibu mapigo.

Naye mbunge wa Simanjiro (CCM) mkoani Manyara, Christopher Ole Sendeka akimpigia debe Sumari alisema atahakikisha anashirikiana naye pindi atakapopatiwa ridhaa kuwa mbunge kutatua tatizo la ajira wilayani humo kwa kuwatafutia ajira katika mgodi wa madini wa Tanzanite One uliopo wilayani Simanjiro mkoani Manyara.

  

Wagombea wa pande hizo mbili Sioi wa CCM na yule wa Chadema, Joshua Nassari waliendelea kunadi sera za vyama vyao pamoja na kutoa ahadi kadhaa kwa wapigakura, huku suala la ardhi likionekana kupewa nafasi kubwa katika kampeni hizo.

Sioi kwa upande wake alisema ikiwa atachaguliwa atashughulikia kero za maji, barabara, uhaba wa masoko, ajira na migogoro ya ardhi.

Alisema migogoro ya ardhi wilayani humo ni tatizo la muda mrefu na kwamba suala hilo ni moja ya mambo ambayo atalitafutia suluhu ikiwa atachaguliwa kuwa mbunge.

Alitaja tatizo jingine kuwa ni uhaba wa ajira kwa vijana na kwamba tatizo hilo atalishughulikia kwa kufungua vituo vya elimu ya ujasiriamali wilayani humo ili waweze kutambua njia za kujiajiri badala ya kusubiri ajira za Serikali.

Naye mjane wa mpigania ardhi ya Wameru,  Nderetwa Kirilo (85), amembariki Mgombea Ubunge  wa Jimbo hilo kwa tiketi ya Chadema, Joshua Nassari kwa kumshika kichwa Kaman ishara ya kumkubali na kumtaka kulinda haki  za Wameru kama alivyokuwa mume wake Japhet Kirilo aliyefariki dunia Mei 30 mwaka 1997.

Akizungumza jana nyumbani kwake katika kata ya Poli, mara baada ya kumbariki mgombea ubunge huyo wa  Chadema, alisema yeye anambariki hata kama ni mgombea wa upinzani, ili mradi anaamini kuwa ataleta maendeleo kwa watu wa Meru.

Kwa upande wake Nassari alimshukuru bibi huyo na kumwaahidi kuendeleza aliyoasisi Mzee Kirilo  kwa kutete haki za wameru hasa kaika suala la ardhi.

Naye Nyerere alisema chama hicho, kina ushahidi wa kutosha juu ya utata wa Uraia wa Sumari na kuna taarifa kuwa sio mtoto wa kuzaa wa mke wa Sumari ambaye alikuwa Mtanzania.

“Sisi tunataka sheria ifuate mkondo sio kutaka kusafishana na tunaomba ieleweke kuwa hatumuogopi Siyoi kwani tunajua tutashinda mapema asubuhi”alisema Nyerere.

Hata hivyo, akizungumza na waandishi wa habari juzi,Msimamizi wa Uchaguzi wa jimbo la Arumeru Mashariki, Trasias Kagenzi, alisema majibu ya rufani ya Tume ya Taifa ya uchaguzi yatatolewa ndani ya siku saba .

Imeandikwa na Ramadhan Semtawa Dar, Musa Juma, Arumeru

Send to a friend

MICHEZO NA BURUDANI NDANI YA NCHI
Sweetbert Lukonge MABINGWA watetezi, Yanga leo watarudi kwenye nafasi yao ya pili kama watafanikiwa kuichapa Villa Squad katika mchezo wa Ligi Kuu ya Tanzania Bara utakaofanyika kwenye Uwanja wa Taifa jijini Dar es Salaam. Yanga ina pointi 40 baada ya kucheza michezo 19, ikiwa nyuma ya Azam kwa pointi moja na nne kwa vinara wa ligi Simba wenye pomti 44, ambapo Azam watashuka dimbani kesho kuikabili Ruvu JKT  huku Simba ikicheza na Mtibwa Sugar. Pamoja na Yanga kuwapoteza nyota wake kadhaa, katikati ya wiki hii ilipata ushindi wa bao 1-0 dhidi ya African Lyon na kurudisha matumaini yao kwamba wanaweza kutetea taji lao. Mabingwa hao watetezi wataingia uwanjani wakiwa na tumaini la kuendeleza kasi ya ushindi dhidi ya vibonde wa ligi Villa Squad yenye pointi 16 ambayo inaonekana kama imekubali kushuka daraja msimu huu. Kocha wa Villa, Habibu Kondo alisema wao wana nafasi kubwa ya kuibuka na ushindi kwenye mechi ya leo kutokana na maandalizi mazuri waliyofanya. "Hatuwaogopi Yanga na tumejipanga kuhakikisha tunaibuka na ushindi kwenye mchezo wa leo kama ilivyokuwa kwa Simba," alisema Kondo. Villa Squad iliwashangaza watu mwaka huu pale ilipowafunga Simba bao 1-0 ukiwa ni moja ya ushindi wake wa nne katika mechi 19 ilizocheza msimu huu. Nahodha wa Villa, Nsa Job atakuwa na kazi moja ya kuhakikisha anawaongoza wenzake kuifunga timu yake ya zamani ya Yanga ili kufufua matumaini yao ya kubaki Ligi Kuu. Pamoja na kushikilia mkia, Villa imefanikiwa kufunga mabao 20 wastani wa bao moja kwa mechi huku nahodha wao Job akiwa amezifumania nyavu mara nane. Ubora huo wa safu ya ushambuliaji wa Villa ni kitu ambacho kocha Kostadin Papic wa Yanga anapaswa kuutafakari na kuangalia upya ukuta wake ulioruhusu mabao 16 wavuni msimu huu. Kurejea kwa kiungo Haruna Niyonzima katika mechi hii kumetoa faraja mpya kwa kocha Papic. Niyonzima atakuwa na jukumu moja la kuwatengenezea nafasi washambuliaji wake Kenneth Asamoah na Davies Mwape na kuna shaka kwamba wataendelea kusababisha maafa kwa ngome ya Villa iliyoruhusu mabao 40. Kwa mara nyingine Shirikisho la Soka Tanzania TFF, limemteua mwamuzi Oden Mbaga mwenye beji ya Fifa kuchezesha mechi ya Yanga katika kipindi cha siku nne. Mwamuzi Mbaga ndiye aliyechezesha mechi ya Jumatano iliyopita wakati Yanga iliposhinda 1-0 dhidi ya Lyon. Mechi nyingine ya leo itachezwa kwenye Uwanja wa Mkwakwani jijini Tanga, ambapo Coastal Union watakuwa wenyeji wa Oljoro JKT ya mkoani Arusha. Ligi itaendelea tena kesho kwa mechi mbili wakati vinara wa ligi Simba watakapokuwa wageni wa Mtibwa Sugar kwenye Uwanja wa Jamhuri mjini Morogoro wakati Azam watakuwa wenyeji wa Ruvu Shooting Stars kwenye Uwanja wa Azam ulioko Chamazi, Dar es Salaam. Simba na Azam zitaingia uwanjani kwa lengo moja la kupata ushindi na kuendelea kubaki katika nafasi mbili za juu. Simba pia watautumia mchezo dhidi ya Mtibwa Sugar kama sehemu ya maandalizi yao ya mechi ya Kombe la Shirikisho dhidi ya ES Setif ya Algeria utaofanyika wiki ijayo. MABADILIKO YA SHINDANO LA MISS TANZANIA NA MIEZI SABA   HIVI karibuni Kamati ya Miss Tanzania chini ya Mkurugenzi wake, Hashim Lundenga ilitangaza mabadiliko ya shindano hilo ngazi ya taifa. Mabadiliko hayo ni pamoja na mchakato utakaotumika kupata mwakilishi wa Tanzania kwenye mashindano ya dunia ya mwaka huu, yatayofanyika Agosti nchini China. Kulingana na mabadiliko ya kalenda ya Miss World kuonyesha mashindano ya mwaka huu yatafanyika Agosti, Kamati ya Miss Tanzania ilipendekeza mwakilishi wa Tanzania kwenye mashindano ya dunia atafutwe kwa kufanyiwa usaili. Tayari zoezi hilo limeanza na watakaofuzu hatua ya 10 bora watapanda jukwaani mwezi Mei kupata mshindi atakayepeperusha bendera ya Tanzania nchini China mwezi Agosti. Kwa mujibu wa Lundega wameamua kufanya hivyo ili Tanzania iweze kuwa na mwakilishi kwenye mashindano ya mwaka huu, huku mchakato wa kawaida wa shindano hilo ngazi ya taifa ukiendelea kama ilivyo kawaida kwa kuanza na ngazi za vitongoji. Mshindi atakayepatikana ambaye atakuwa Redds Miss Tanzania 2012, ambaye kwa mujibu wa ratiba ya Kamati ya Miss Tanzania shindano hilo litafanyika Septemba jijini Dar es Salaam, ndiye atapeperusha bendera ya Tanzania kwenye mashindano ya dunia ya 2013. Ikumbukwe kwamba mrembo huyu ambaye atapeperusha bendera ya Tanzania kwenye Miss World ya 2013 atakuwa na miezi saba zaidi ya kufanya maandalizi kabla ya kushiriki mashindano ya dunia. Hiyo inatokana na mabadiliko ya kalenda ya dunia ambapo Miss Tanzania itafanyika Septemba mwaka huu kwa ajili ya mashindano ya dunia yatakayofanyika Agosti mwakani. Kwa mtazamo wangu mchakato huu unaweza kuwa na manufaa kwa warembo wetu na kuwajengea mazingira mazuri ya kufanya vyema kwenye Miss World tofauti na ilivyokuwa hapo awali. Nasema hivyo kwa maana kwamba Mrembo wa mwaka huu ambaye ataiwakilisha nchi kwenye Miss World ya 2013 atakuwa na muda wa kufanya maandalizi ya kina ikiwa ni pamoja na kufanya kazi za kijamii kwa ufanisi zaidi tofauti na waliomtangulia. Miezi saba ya maandalizi kwa watu makini wanaojua nini wanafanya, ni wazi watamwandalia mazingira mazuri ya kufanya kile Watanzania wanachohitaji kuona kinatendeka katika medani hii ya urembo kimataifa. Ndani ya miezi hii saba mrembo huyu atakuwa amefanya maandalizi ya kina tayari kwa kupeperusha bendera ya Tanzania kwenye mashindano ya dunia na hatimaye kufanya vyema na kuitangaza vyema nchi. Nasema hivyo kwa maana kwamba mara kadhaa tumekuwa tukifanya vibaya kwenye mashindano ya dunia kutokana na ukweli kwamba moja ya sababu kubwa iliyochangia kufanya kwetu vibaya ni maandalizi ambayo kwa namna moja naweza kuyaita yalikuwa kama mvua za rasharasha. Ni wazi kwamba maandalizi ya mwezi mmoja hayakuweza kuwaandaa warembo waliotangulia kiushindani zaidi ya kuwaandaa kushiriki tu mashindano ya dunia na ndivyo ilivyokuwa kwa warembo wetu karibu wote walioiwakilisha nchi kwenye mashindano ya dunia. Pongezi kwa Nancy Sumari ambaye ni mrembo pekee wa Tanzania aliyeweza kung'ara na kuingia hatua ya tano bora akiwa ni miongoni mwa warembo 120 walioshiriki shindano hilo mwaka 2005 na kuifanikisha Tanzania kupanda kwenye viwango vya ubora vya chati ya Miss World. Ilikuwa ni vigumu kwa mrembo huyo ndani ya mwezi mmoja aandaliwe na kufundishwa mbinu mbalimbali za urembo, huku ndani ya mwezi huohuo mrembo huyo akitakiwa kufanya kazi za kijamii kabla ya kuondoka. Ni dhahili kwamba kwa muda wa mwezi mmoja mrembo huyo alikuwa akirundikiwa vitu lukuki ambavyo vyote alitakiwa akidhi kwa muda huo kabla ya kuondoka. Kwa mfumo huo ilikuwa ni sawa na kumrisha ng'ombe chakula kingi siku ya mnada ili anenepe kitu ambacho kwa upande mmoja kitakuwa na madhara. Lakini pamoja na mchakato uliotumika mwaka huu kumpata mwakilishi wa Tanzania kwenye Miss World kutuathiri kwa kiasi flani lakini bado hali hiyo inaweza kututoa kimasomaso kwenye Miss Word ya mwakani kwa mwakilishi wetu. Cha msingi na Kamati ya Miss Tanzania izingatie maandalizi ya jumla kwa mrembo atakayepeperusha bendera ya Tanzania kwenye mashindano ya dunia 2013 ili aweze kuleta tija kwa taifa zima la Tanzania kwa kufanya vizuri kwenye mashindano hayo. WAWEZA TOA MAONI YAKO KWA KUPITIA KWENYE KIPENGERA CHA MAONI HAPO CHINI.