Rais wa Zanzibar na Mwenyekiti wa Baraza la Mapinduzi, Dk. Ali Mohammed Shein ameagiza ndani ya wiki moja kuandaliwe utaratibu wa ununuzi wa meli ya abiria na mizingo yenye uwezo wa kubeba abiria 1000.
Taarifa ya Ikulu iliyotolewa jioni ya Julai 27 mwaka huu ilisema kwamba Rais Shein ameiagiza Wizara ya Nchi Ofisi ya Rais Fedha, Uchumi na Mipango ya Maendeleo kuanza mchakato huo.
Meli inayotakiwa kununuliwa mbali ya kuwa na uwezo wa kubeba abiria 1000 kwa wakati mmoja,pia iwe na uwezo wa kuchukua mizigo yenye uzito wa tani 100.
Katika mazungumzo yake na Bodi ya Shirika la meli Zanzibar Rais Dk. Shein aliwahakikishia wajumbe wa Bodi hiyo kuwa Serikali imedhamiria kununua meli ya uhakika ili kurahisha usafiri na usafirishaji kwa wananchi wa Zanzibar.
Mbali ya Bodi ya Shirika la Meli, katika kikao hicho kilihudhuriwa na viongozi wa Wizara ya Miundombinu na Mawasiliano na Wizara ya Nchi Afisi ya Rais Fedha, Uchumi na Mipango ya Maendeleo.
Agizo la Rais Shein limeitaka Wizara yenye dhamana ya fedha kufanya kila wawezalo kuhakikisha wanapata fedha kutoka vianzio vya ndani au nje ya nchi ama kutokana na taasisi zinazohusiana na mambo ya fedha kununua meli hiyo.
Rais Dk. Shein ameagiza pia katika kipindi kisichozidi miezi miwili ujumbe wa Serikali uende katika makampuni yanayotengeneza meli nchini Korea Kusini, China au Japan kwa ajili ya kuwasilisha fedha za utangulizi kwa ajili ya utengenezaji wa meli hiyo.
Wakitoa maelezo kwa Rais, Viongozi wa Shirika la Meli Zanzibar walisema kuwa meli mpya yenye ukubwa inayotakiwa na Serikali huchukua muda wa mwaka mmoja kutengenezwa.
Kikao hicho ambacho kilikuwa na lengo la kuangalia mwelekeo na Mipango ya Shirika la Meli pia, kilijadili hali halisi ya meli za Shirika la Meli na baadae kujadili masuala ya ununuzi wa meli mpya itokayowaondoshea usumbufu wa usafiri wa baharini wananchi wanaosafiri kati ya Unguja, Pemba na Tanzania Bara.
No comments:
Post a Comment