Je, Ni Nani Anayemfariji Msichana Huyu Wa Miaka 18 Aliyeondokewa Na Mpenzi Wake?

Ndugu zangu,

Ni kazi ngumu kuwa wakili kwa anayeonekana na jamii kuwa ni ' shetani'. Lakini, kwenye hili la kifo cha kusikitisha cha msanii Steven Kanumba kuna haja ya kukaa chini na kutafakari kwa bidii kwani inabidi kujipanga kwa hali ya juu sana. 

Kuna maswali pia ya kujiuliza juu ya msichana huyu wa miaka 18 ambaye sehemu kubwa ya jamii imeshamuhukumu kuwa ni muuaji ya musanii mwenzake .

Kuna hata ambao hawalijui jina lake  kamili, bali, anajulikana kama ' Lulu'.  Jina lake halisi

ni

Elizabeth Michael . 

Simulizi ya Lulu inaonyesha kuwa yeye na Kanumba walikuwa na mahusiano. Na wivu pia umeingia kwenye mahusiano yao. Hivyo basi, ugomvi na hatimaye kifo cha Kanumba.

Uchunguzi kamili haujakamilika. Na kama haujakamilika, basi, Lulu anabaki kuwa ni mtuhumiwa na si muhusika na kifo hicho. Kumwita Lulu muuaji  ni kuharakisha kutoa hukumu isiyo ya haki. Pamoja na machungu yetu, lakini wanadamu tunapaswa kuwa na subira ili tusubili vyombo husika kutoa hukumu juu ya kifo cha Kanumba na sio kumtuhumu mtu yeyote.

Na ukweli unabaki, kuwa Lulu ni mwanadamu kama wewe na mimi. Na kwa yote yaliyotokea, anabaki kuwa ameondokewa na mpenzi wake. Je, ni nani anayemfariji msichana huyu wa miaka 18 aliyeondokewa na mpenzi wake?

MJEGWA na Eliud